बुद्धशान्ति प्रेस क्लबले गरिदियो बुद्धशान्तिका सबै पत्रकारको दुर्घटना बीमा

बुद्धशान्ति/ बुद्धशान्ति प्रेस क्लबले बुद्धशान्तिलाई कार्यथलो बनाएर पत्रकारिता गरिरहेका सकृय पत्रकार तथा सञ्चारकर्मीहरुको निःशुल्क सामूहिक दुर्घटना बीमा गरिदिएको छ ।
प्रेस क्लबले २० जना पत्रकारहरुको निःशुल्क सामूहिक दुर्घटना बीमा गरिदिएको हो । प्रेस क्लबको वार्षिक कार्यक्रम अनुसार हरेक वर्ष नविकरण हुनेगरी २० जनाको २० लाख बराबरको दुर्घटना बीमा गरिएको प्रेस क्लबका अध्यक्ष तीर्थराज तिम्सनाले बताएका छन् । उनले पत्रकारको भौतिक सुरक्षा साथै सम्भावित जोखिमलाई थोरै भएपनि न्यूनीकरण गर्न दुर्घटना बीमाले महत्वपूर्ण भूमिका खेल्ने बताएका छन् ।
ग्रामीण क्षेत्रमा पत्रकारिता गर्ने पत्रकारहरुको पेशागत र भौतिक सुरक्षामा प्रेस क्लब गम्भीर रहेको बताउँदै प्रेस क्लबका उपाध्यक्ष नारायण अर्यालले पत्रकारको दुर्घटना बीमा अपरिहार्य रहेको बताए । बीमाका लागि सेवाप्रदायक बिभिन्न कम्पनीहरुसंग प्रस्ताव माग गरिएकोमा नेपाल माइक्रो इन्स्योरेन्सलाई छनोट गरी सोहीमार्फत् बीमा सम्झौता गरिएको क्लबका सचिव रोशन भट्टराईले बताए । बीमा कम्पनीका बिर्तामोड शाखा प्रमुख दिपक काफ्ले र प्रेस क्लबका अध्यक्ष तिम्सिनाले सम्झौता पत्रमा हस्ताक्षर गरी सम्झौता गरेसंगै बीमा समेत लागू भएको छ ।